“Кәкүк сәйе” нә сығыу борондан килгән, хәҙерге көндә онотолоп барған йолаларҙың береһе. Ошо йоланы тергеҙеү, балаларға аңлатып, башҡорт халҡының йолалары аша тәрбиә биреү маҡсатында, 27 май Антингән ауылының Ағинәйҙәр, Аҡһаҡалдар хәрәкәте, уҡыусылар һәм ҡунаҡтар матур тәбиғәт ҡосағына йыйылды.

“Кәкүк сәйе” байрамы кәкүк саҡыра башлағас, кәкүк емеше сыҡҡас уҙғарыла, тип был йола хаҡында китапханасы Банат Зәкир ҡыҙы аңлатма биреп үтте. Борон-борондан башҡорттар ҡоштарға табынып йәшәгәндәр. Кәкүк –халҡыбыҙҙың риүәйәт –әкиәттәрендә ҡошҡа әйләнгән әсәне йәки һөйгәненә мәңге тоғро ҡалған ҡыҙҙы сағылдыра. Ҡарға, кәкүк кешеләргә изгелек килтереүсе ҡоштар, тип иҫәпләгән халҡыбыҙ. Шуға күрә уларға бағышлап, байрамдар ойошторғандар. Уларҙан йәйҙең матур килеүен, игендең ишелеп уңыуын һорағандар.

Артабан ҡоштар тураһында йомаҡтар ҡойолдо, төрлө милли уйындар уйнатылды. Илдәр именлеген, иген ишелеп уңыуын, йәйҙәр матур булыуын теләп,тәмле ризыҡтар менән һыйланып, самауыр сәйен эсеү менән тамамланды был күркәм йола.