Яңы йыл ҡайҙа, ҡасан килә? Ошо һорауға яуап эҙләп үҙәк район китапханаһы хеҙмәткәрҙәре 5 ғинуар хеҙмәт ветерандары өсөн «Аяҡ баҫһын Әтәс йылы бәхет нурҙары менән!» исемле ял кисәһе ойошторҙо.

Һәр илдең үҙенең тылсымлы Яңы йыл килтереүсеһе бар. Беҙҙә уны Ҡыш бабай алып килә. Ә бына Америкала – Санта-Клаус. Үзбәк халҡында түбәтәй кейгән Ҡар баба, молдавандарҙа Ҡаракүл бүрекле Мош Джерилэ бүләк һәм күстәнәстәр тарата. Баббо Натале – итальяндарҙың Ҡыш бабайы. Италияла, Яңы йылды иҫкенән ҡотолоп ҡаршы алырға кәрәк, тип  иҫәпләйҙәр.

       Төрлө илдә был байрам төрлө ваҡытта үткәрелә. Мәҫәлән, Афғанстанда ул баҫыу эштәре башланғас тыуа. Һиндостанда ноябрь айында Йылан көнө тип байрам ителә.  Рәсәйҙә Петр I указы буйынса Яңы йыл 1 ғинуарҙа 1700 йылда байрам ителә башлай. Ошондай ҡыҙыҡлы тарихи мәғлүмәттәр менән ял итеүселәрҙе таныштырып  үттек. Шулай уҡ мәҡәлдәр, ырымдар, һынамыштарҙы иҫкә төшөрөп Әтәс йылы матур, уңышлы йыл буласаҡ тип иҫбатланылар. Йыл ялҡауҙарҙы яратмай, бер туҡтауһыҙ эҙләнгән, тырышҡандарға уңыш йылмаясаҡ.

      Кисә барышында  халыҡ уйындарын уйнап, йырҙарын йырлап кәйефтәрен күтәрҙеләр. Был үткәрелгән саранан хеҙмәт ветерандары  рух күтәренкелегендә, йылыбыҙҙың бәрәкәтле, хәйерле яңылыҡтарға мул,  атасаҡ таңдарыбыҙҙың яҡты булыуын теләп изге ниәттә таралыштылар.